ENHANCED COMMUNITY QUARANTINE INFORMATION

NGANONG KINAHANGLAN KITA NGA MOPAILAWOM SA ECQ? ANGAY BA KITANG MABALAKA?

Angay lang kita nga mabalaka tungod makamatay ang sakit nga Covid-19. Anaa na ang virus karon sa atong mga komunidad. Ubay-ubay na ang mga Dabawenyo ang natakdan sa Covid-19 apan wala lang sila nasayod kung kinsa ang nakatakod kanila. Angay kitang mabalaka tungod kay molungtad pa og pila ka adlaw una nato mahibal-an ang resulta sa testing. Tungod sa kadugay niini, posible nga mokuyanap pa ang virus ug motakod sa ubang tawo sa mga barangay — apil na ang meyembro sa atong pamilya.

UNSA ANG KALAHIAN SA COMMUNITY QUARANTINE SA ENHANCED COMMUNITY QUARANTINE?

Ilawom sa Enhanced Community Quarantines (ECQ) —

1. Wala nay mass transportation

2. Pipila nalang ka sektor sa mga pribadong kompanya ang tugutan nga manarbaho

3. Ang mga nahibiling opisina sa gobyerno nga abli ug tugutang mag-operate mao ang dunay kalambigitan sa disaster, social services, health, ug security.

DUNA BAY PASADA ANG MGA JEEP?

Wala na. Dili na tugutan nga makapamasada ang mga jeep.

UNSAY SAKYAN SA MGA MANULOD SA TRABAHO?

1. Libreng Sakay sa mga bus

2. Tricycle (1 driver, 1 pasahero sa atubangan ug 1 pasahero sa likod)

3. Taxi ug pribadong sakyanan (1 drayber, 1 ka pasahero sa atubangan, 1 pasahero sa likod)

4. Motorcycle (1 driver, walay laing sakay)

5. Bicycle (1 driver, walay laing sakay)

6. Baktas/maglakaw

KINSA LANG ANG TUGUTAN NGA MOTRABAHO SA GOBYERNO?

Tugutan lang nga motrabaho ang mga empleyado sa mga opisina sa gobyerno nga dunay kalambigitan sa disaster, social services, health or security.

KINSA LANG ANG TUGUTAN NGA MOTRABAHO SA PRIBADONG SEKTOR?

Sa pribadong sektor, tugutan lang nga motrabaho ang mga empleyado sa mga mosunod:

Groceries, supermarkets, wet markets/palengkes, food commissaries, food processing and manufacturing, food delivery services, wholesale food stores, convenience stores, sari-sari stores, hospitals, medical laboratories, pharmacies, drugstores, doctor's and dentist clinics, other health personnel/services, banks and ATMs, savings and credit cooperatives, money-transfer services and bayad centers, courier services, other delivery services, gas stations, water refilling stations, LPG stations, business process outsourcing/call centers and mass media outlets.

Ang mga restaurant, cafe, eatery o karenderia, food stalls ug mga susama nga klase sa tindahan tugutan nga maka-abli apan alang lang kini sa take-out orders, ug food delivery services.

ANGAY BANG MAG-PANIC O MAHADLOK TUNGOD KAY IPAILAWOM NA KITA SA ECQ?

Walay angay nga kahadlokan kung ipailawom ang Davao City sa ECQ. Mamahimo gihapong makagawas sa balay ang usa o duha ka meyembro sa matag-pamilya gamit ang Food and Medicine Pass o FM Pass para mamalit og pagkaon, medisina o muadto sa hospital.

UNSA ANG ORAS SA LIQUOR BAN?

‪5 pm hangtod 8 am‬

UNSA ANG ORAS SA CURFEW?

‪9 pm hangtod 5 am‬

PWEDE PA BA NGA MOGAWAS PANAHON SA CURFEW?

Tugutan lang nga mogawas sa panahon sa curfew ang mga empleyado sa mga opisina sa gobyerno nga dunay kalambigitan sa disaster, social services, health or security.

Tugutan sab ang mga empleyado sa grocery stores, supermarkets, wet markets/palengke, food commissaries, food manufacturing, food delivery services, wholesale food stores, convenience stores, hospitals, medical laboratories, pharmacies, drugstores, other health service/personnel.

ABLI BA ANG MGA SARI-SARI STORES ILAWOM SA ECQ?

Abli apan kinahanglan nga sirado ang mga sari-sari stores panahon sa curfew (gikan ‪9pm‬ hangtod ‪5 am‬).

DUNA BAY IPAGAWAS O IHATAG NGA WORK PASS? UNSA ANG KINAHANGLAN SA USA KA TRABAHANTE ARON MAKAGAWAS UG MAKAREPORT SA TRABAHO?

Walay work pass. Kinahanglan lang ang valid company ID. Kinahanglan nga ang ID gapakita nga ang trabahente apil sa mga sektor nga ginatugutan nga magpadayon ang operasyon.

UNSAON PAGGAWAS ARON MOPALIT OG PAGKAON, MEDISINA, O PAG-ADTO SA OSPITAL?

Tugutan ka lang nga mogawas gamit ang Food and Medicine Pass o FM Pass.

UNSAON PAGGAWAS KUNG DUNAY EMERGENCY?

Sa panahon sa emergency, di na kinahanglan ang pass o bisan unsang klaseng dokumento.

UNSAON PAGGAMIT SA FOOD AND MEDICINE PASS O FM PASS?

Dalha kanunay ang FM Pass ug ang imong valid ID. Kanunay sab nga hinuduman nga sa imong paggawas, suot nimo kanunay ang face mask, distansya og duha ka metro sa ubang tawo, ug hugasan ang kamot gamit ang tubig ug sabon — ilabi na una ka mosulod og balik sa inyong balay.

ASA MI MOKUHA OG FM PASS?

Dunay mga naka-assign nga mga konsehal matag-lugar sa siyudad. Sila ang mahimo natong Team Leaders. Ang mga Team Leader ang mohatod sa mga FM Pass ngadto sa mga Kapitan sa Barangay. Ang mga Barangay Captain maoy mohatod sa mga FM Pass sa mga Purok Leader. Ang mga Purok Leader ang mag-apud-apod sa mga FM Pass ngadto sa katawhan.

UNSAON NAMO PAGKUHA OG FM PASS GIKAN SA AMONG PUROK LEADER?

Ipang-apud-apod sa mga Purok Leader ang mga FM Pass pinaagi sa house to house distribution.

Mamahimo sab nga magpatuman ang mga Purok Leader og ilang kaugalingon nga paagi sa distribusyon basta masiguro lang nga hapsay kini, han-ay, ug ginasunod gihapon ang social distancing.

WALA KO NAKAILA SA AMONG PUROK LEADER, UNSAY AKONG ANGAY NGA HIMUON?

Kinahanglan nga moadto ka sa Barangay Hall. Ihatag ang imong eksaktong address ug kuhaa ang mga detalye sa imong Purok Leader — Pangalan, Address, contact numbers.

NAGPUYO KO SA USA KA SUBDIVISION UG ADUNA KAMI HOUSING ASSOCIATION, PWEDE BA NGA KAMI NA LANG MAG-DISTRIBUTE OG FM PASS?

Pwede nga kamo na lang ang mag-distribute sa mga FM Pass ngadto sa mga miyembro sa association sa subdivision. Kuhaon lang sa opisyal sa subdivision o association ang FM Pass gikan sa Purok Leader ug i -distribute kini house to house. Siguruhon lang nga ang distribution hapsay, han-ay, ug ginasunod gihapon ang social distancing.

BALIGYA BA ANG FM PASS?

Libre ang FM Pass. Dili kani mapalit ug dili kini baligya. Ipadakop sa pulis ang mga mamaligya o mameke sa FM Pass ug mag-atubang sila og silot.

KINSA ANG MAMAHIMONG MAKADAWAT SA FM PASS?

> ‪1 FM‬ Pass para sa boarder, sharer, o renter

> ‪1 FM‬ Pass kada usa ka-pamilya

> ‪1 FM‬ Pass alang sa mga indibidwal nga nagpuyong nag-inusara o walay pamilya o kuyog sa panimalay, sama sa senior citizen, ug uban ba

PILION LANG BA ANG MGA MAKADAWAT OG FM PASS?

Dili. Kinahanglan nga makadawat og FM Pass ang matag-pamilya o ang usa ka tawo nga nag-inusarang namuyo sa usa ka panimalay, sama sa senior citizen. Apil nga makadawat ang boarder, renter, o sharer.

MAKAGAWAS BA ANG SENIOR CITIZEN ILAWOM SA ECQ?

Gamit ang FM Pass, makagawas ang senior citizen aron mopalit og pagkaon, tambal o kung moadto sila sa hospital.

WALA KO NAHATAGAN OG FM PASS SA AMONG PUROK LEADER, KANG KINSA KO MOREKLAMO?

Mamahimong moreklamo sa inyong Barangay Captain. Mahimo sab kamong mopadangat sa inyong reklamo sa Davao City Reports pinaagi sa pag-text sa ‪0917 131 2333‬ ug ‪0919 072 2222‬ o sa FB @davaovcityreports.

HANGTOD KANUS-A ANG ENHANCED COMMUNITY QUARANTINE?

Ang ECQ modugay hangtod ‪11:59‬ sa gabii ‪sa April 19, 2020‬. APAN posible nga molapas pa kini sa gitakda nga panahon hangtod sa ‪11:59‬ sa gabii ‪sa April 26‬, 2020 kung irekomenda kini sa mga doctor.

KUNG MATAPOS NA ANG ECQ, PWEDE NA BA KAMING MANGGAWAS?

Dili. Human ang ECQ posible nga ipailawom pag-usab ang dakbayan sa community quarantine kung irekomenda kini sa mga doctor.

KANUS-A MAHUMAN ANG QUARANTINE O KANUS-A LIBRE NA NGA MAKAGAWAS ANG TANAN?

Mamahimong normal na pagbalik ang atong kinabuhi kung motuman ang tanan sa mga gitakda nga guidlines sa mga doctor kalabot sa quarantine ug uban pang mga gimbuhaton aron batukan ang makamatay nga Covid-19. Kung wala nay Dabawenyo nga dunay impeksyon, mamahimo nang tapuson ang quarantine.

KANUS-A MAGSUGOD ANG ECQ?

Magpagawas ang City Government of Davao og Executive Order aron ipatuman ang ECQ.

https://www.facebook.com/davaocitygov https://www.facebook.com/davaocitygov

YOUR REACTION?

Facebook Conversations